Ithandwa kufanele i-Suzuki Swift edayisa okwamaswidi

Fanelesibonge Bengu

IMOTO: SUZUKI SWIFT

KUMANGALE abaningi ngesikhathi kuvela izibalo zangoJanuwari, zokuthengwa kwezimoto ezintsha i-Suzuki Swift ihleli esicongweni igudluza i-Toyota Hilux.

Izibalo ze-Naamsa zikhombe ukuthi kuthengwe ama-Swift angu-2 628, -iHilux yalandela ngo-2 556.

KwezangoJanuwari, i-Hilux nokho ibuyelile endaweni yayo kuthengwa angu-2 683.

Yize kunjalo i-Swift ilale isibili ngo-2 351 okuyenze yahamba phambili esigabeni sezimoto ezincane, ama-passenger cars.

Kwabanye kungathusa lokhu ukuthi i-Swift ikwenza kanjani kodwa mina akungimangazi ngemuva kokuchitha nayo amasonto ambalwa, ngihamba amakhilomitha angu-3 081.

Obunye ubufakazi bezinga layo wukuthi ingenye yezimoto ezingaphansi kuka-20 okuzokhethwa kuzo i-2025 South African Car of the Year exhaswe yi-Old Mutual Insure.

Okokuqala, okuheha kuyo yintengo yayo eqala ku-R219 900. Uke uthi uyabheka izimbangi ezifana ne-VW Polo Vivo ubone ukuthi imali eqala kuyo u- R271,900.00 uthola u “last number” we-Swift i-GLX esihamba ngayo kusale noshintshi. I-Swift injalo inezinto ezithe xaxa kuyo kune-Vivo eyinamathele eduze nangokudayiswa njengoba kuthengwe awu-2 187 ngoFebhuwari.

I-Swift inama-LED daytime running lights futhi amalambu ayazikhanyisa uma kuba mnyama, inama-fog lights bese iba namarimu angu-15 inch. Nalo mbala wayo osawolintshi uyathandeka.

Ngaphakathi iyakwenelisa uma ungumuntu ongenawo umndeni omkhulu. Isikhala ebhuthini sikahle nokusizwa wukuthi inesondo elincane eliyisipele ngakho lithatha indawo encane.

Ngaphakathi abagibeli bahlala kahle yize ungeke ukhululeke ngemuva uma ungumuntu omude.

Engikuthandayo wukuthi inamawindi kagesi yonke indawo, izibuko emaceleni nazo zihlelwa ngogesi, ine-automatic climate control, nembobo eyodwa yokushaja nge-USB. Ukube kuya ngami izimbobo bezingaba mbili okungenani kodwa bese ngisizwa wukufaka kwi-12V socket ishaja engu-type C.

I-touchscreen infotainment system yayo ngibone kulula ukuyisebenzisa, igqame kahle futhi iveza izinto eziningi. Ngibala ingaphandle uma ihlehla okungamakhamera asizwa nangama-sensor okuyinto enhle, uxhuma iselula nge-Apple CarPlay, udlala umsakazo iphinde iveze imininingwane efana nophethroli onawo.

Noma uyithinta kwi-dashboard iqine kahle noma ingeke ifike ezingeni le-Vivo.

Ingaphakathi lipheleliswa wubukhona kwama-airbag ayisithupha engeza ezokuphepha okungenye yezinto eziyenza izihambele yodwa kunezimbangi. Ezinye izinto zokuphepha nezilekelela umshayeli yi-Electronic Stability Programme, ABS ne-cruise control.

Izindlela bengizishaya ihamba ngenjini engu-1.2 litre kaphethroli engenayo i-turbo. Inamandla angu-60kW ne-torque engu-112Nm. Bengiziconsisela u-R100 ngigudle isonto lonke ngoba bengizulazula edolobheni. Ibilokhu iveza ukuthi idla amalitha angu-5.6 ngo-100km okuyinto engasondele ku-4.4l/100km oshiwo kubo kwayo.

Amagiya enawo ayisihlanu futhi ishintsha kalula. Yize amandla engangayo kodwa bekuba nezikhawu lapho ngizwe ngathi ayashoda kancane khona engicabanga kudalwa nawukuthi isinamasilinda amathathu.

Njengemoto yokuqala noma ufuna ukunciphisa uthole eshibhile, ayikhalisi impela yona, iyinyama. Nami nje impela ukhiye ngiwubuyisele emuva ngingakathandi.

Intengo:

Suzuki Swift 1.2 GLX manual: R264,900

Ifika ne-service plan yeminyaka emibili noma u-30 000km ne-warranty yeminyaka emihlanu noma u-200 000km.