UKHATHAZEKILE uMphathiswa wezeMfundo KwaZulu-Natal, uMnuz Sipho Hlomuka, ngothisha ababalelwa ku-40 000, ababhuquza emakhaya neziqu.

Lokhu sekwenze waqhamuka nesu ukuze labo thisha bayeke ukujika nelanga baphinde bacoshe nesipiliyoni ngokuthi aphakamise ukuthi bafakwe ohlelweni lwabazosiza ezikoleni.

Lolu wuhlelo olungaphansi kukaMengameli Cyril Ramaphosa lokuzama ukunika intsha engatohozi isipiliyoni somsebenzi, kanti lwaziwa nge-Presidential Youth Employment Initiative (PYEI).

Ngaphansi kwalo kuqashwa intsha ebalelwa ngaphezu kuka-300 000 kuleli, isikhashana ukuze ifake isandla isize othisha ezikoleni.

UHlomuka uthe useke wayixoxa noNgqongqoshe kazwelonke, uNksz Siviwe Gwarube eyalesi siphakamiso, egqugquzela ukuthi kufakwe okungenani labo thisha kunokuthi kugxilwe entsheni eno-matric.

"Cishe ibalelwa ku-35 000 kuya ku-40 000 intsha okumele ithole amathuba ngaphansi kwalolu hlelo lukamengameli eKZN. Kumele iqale umsebenzi ngoMeyi 1. Sithi ayingabhekwa eyeminyaka yomuntu uma kuthiwa kukhona uthisha oneminyaka engu-40, akafakwe ngaphansi kwalolu hlelo kungaze kuthiwe kufuneka umuntu omusha," kusho uHlomuka ekhuluma ekomitini lezeMfundo esiShayamthetho muva nje ngesabelomali somnyango.

Uthe enye ingxenye yemali yokukhokhela laba basizi, izoqhamuka kuMgcinimafa esifundazweni, kuthi enye iqhamuke ngaphansi kweHhovisi likaMengameli.

"Besiphakamise kanje ngoba uma kukhona abantu abaneziqu kungani kungafakwa bona? Sifuna kube naleso sivumelwano ukuze silwe nenkinga yothisha abangasebenzi," kusho uHlomuka.

UHlomuka ubuye wakhala ngokuhamba kancane kohlelo lokuqashwa kothisha ezikhaleni u-Post Level 1, ezazikhangiswe nyakenye.

"Sakhangisa izikhala ezevile ku-700, zika-Post Level 1 ngo-Agasti ngonyaka odlule. Uhlelo lokuvala lezi zikhala luhamba kancane kakhulu, abakafiki ngisho ku-60% asebeqashiwe. Lolu hlelo lubambezeleke ezigungwini ezilawula izikole okuyizo okumele zibe matasa nohlelo lokuphonsa imibuzo abazoqashwa," kukhala uHlomuka.

Uthe uma lolu hlelo luhamba kancane kanje, kuzoba nezinselelo uma sekumele kuqashwe abazosiza othisha ezikoleni okumele baqale ngoMeyi.

Ibamba likasihlalo wekomiti lezemfundo esiShayamthetho, uNksz Hlengiwe Mavimbela, lishaqekile ngesibalo sothisha abangasebenzi esifundazweni.

UNksz Mavimbela njengoba kunesidingo sokuthi kube nabasizi bothisha ezikoleni kukhomba khona ukuthi kunesidingo sokuthi kube nothisha kulezo zikhala.

"Kumele kufakwe abantu abaneziqu kunokuthi kubhekelelwe abano-matric kuphela. Akuwenzi umqondo ukuthi bengathi bekhona abaneziqu kodwa bashiywe ngaphandle."

Uthe labo abano-matric sebengangezwa uma kungukuthi zisekhona izikhala kulezo zikole.

Ukhale nangeigungu ezilawula izikole ngokuhamba kancane kohlelo lokuqasha othisha abaku-Post Level 1, wathi lezi zigungu azibacabangeli abafundi.