Mila van Wyk, wat Bloemhof se DUX-leerder vir 2023 word hier op die dag van die bekendmaking van die 2023 matriekuitslae gelukgewens deur Bloemhof skoolhoof Wilna van Heerden.
Die Hoër Meisieskool Bloemhof se matriekuitslae is vanjaar weereens tops met die behaal van ’n 100% slaagsyfer asook die slaag van 98% van die leerlinge met universiteitstoelating.
Luidens die skool se inligting is Mila van Wyk, Bloemhof se DUX-leerling vir 2023 en spog sy met ’n allemintige 95,17% gemiddeld vir al haar vakke.
Hierdie top matriekpresteerder gaan vanjaar Aktuariële Wetenskappe aan die Universiteit van Stellenbosch studeer.
Haar droom is om eendag haar eie maatskappy te besit en haar eie baas te wees.
Sy sien ook daarna uit om eendag haar eie gesin te hê en meen ‘n goeie werk-lewe balans is hoog op haar prioriteitslys vir die toekoms.
Haar resep tot sukses is om selfdissipline toe te pas. “’n Mens is nooit werklik lus om te leer en hard te werk nie, maar jy moet altyd jou doel voor oë hou en dit wat jy wil bereik in jou agterkop hê. Dit gee vir jou iets om na toe te werk, selfs wanneer jy ongemotiveerd is.”
Sy meen ook dit is belangrik om jou manier van leer goed te ken en uit te vind watter leermetodes vir jou werk, sodat jy daarby kan hou. Sy skryf haar sukses ook grootliks toe aan die ondersteuning en hulp wat sy van haar onderwysers, vriende en familie ontvang het.
Kort op haar hakke volg Thea-Mari Roos met ’n gemiddeld van 94,83% vir haar sewe vakke. Lara Potgieter, Catherine Kies en Catrien Müller het elkeen 8 A-simbole behaal.
In totaal het hierdie groep matrieks gesorg vir 483 vak A’s, 3,57 A’s per leerder en 50 A-gemiddeldes. Boonop het 76,8% van die totale klasgroep van 135 leerlinge ’n B-gemiddeld of hoër verwerf.
Verdere uitslae maak bekend dat 3 kandidate slaag met 8 A’s, 17 slaag met 7 A’s, 14 slaag met 6 A’s, 16 slaag met 5 A’s, 11 slaag met 4 A’s en 45,2% slaag met 4 of meer A-simbole.